fbpx

【同小朋友去戲院】- HR Siri

2019-12-12
兩位冰雪公主第二集上映, 全城又掀起一番熱潮,我哋兩個中哂毒嘅小公主已經率先在第一個上映嘅週末就看了。

講起同小朋友睇戲,相信大家都有很多有趣嘅經歷。首先,幾多歲先至係適合帶小朋友入戲院呢?我自己則等到五歲先帶大囡第一次去睇戲,我以為算遲啦,仲帶埋三歲嘅細囡一齊去。結果……我覺得為己為人,係應該遲啲先帶小朋友入戲院的。

一個三歲嘅小朋友喺一個戲院裏係會好按捺不住的,加上佢哋張椅子又坐得唔舒服,因為腳仔短得滯成日摺埋咗,於是兩下就要坐大脾,而且只能去一些沒有特別音效的戲院,如果音響太勁好易嚇親。父母們仲有要不斷應付她們連珠發砲式對劇情的問題,仲成日問「完未呀?」往往最尷尬的就係全塲靜默之後佢哋突然大聲爆一句嘢出嚟,變咗一個笑位。另外,最好去一啲行距比較寬敞的戲院,等佢陣間興奮嗰陣唔好踢到前面個位。當然仲要去哂廁所先,如果唔係,張戲飛真係好唔抵。

如果怕小朋友驚,可以約埋佢哋嘅朋友仔一齊去,可以壯吓膽,要驚就一齊驚。不過,佢哋會忍唔住討論劇情。我發覺,有時候睇佢哋嘅反應、聽佢哋講嘅嘢分分鐘係好睇過套戲!

小朋友有時候睇完戲之後無法抽離,代入咗入面嘅主角,要狂loop番入面嘅歌或者要著佢哋嘅衫。除咗要買主角嘅產品之外,我女兒仲有次同我講佢喺張床度好似聽到戲入面嘅歌聲(幻聽?)… 近期周圍也像地雷陣,舖天蓋地都是兩位公主的產品,帶小朋友出街好危險!

公司都有搞員工及親友嘅電影夜,係我哋每年最受歡迎嘅員工活動之一,因為有得免費睇戲唔駛撲飛之餘仲可以同其他聯誼一下,一舉兩得。仲有,熄咗燈就唔駛social,比較輕鬆。

HR Siri

💟💟💟💟💟💟💟💟💟💟💟💟
🤗HR Siri希望成為您的虛擬助理,一起面對生活中的種種挑戰。🙌
🙌如果大家在職場或家庭遇到甚麼趣事或煩惱,都可以告訴HR Siri。
💌歡迎在👇下面留言,或者WhatsApp 9169-4738,一起分享您的喜與樂!

#LoooKLearningBrand #HR Siri #WorkingMumColumn