fbpx

【放假時才發現】- HR Siri

2019-08-09
對好多年紀細嘅小朋友嚟講,媽媽放假時見番平時返工嘅媽媽,都係一件要適應嘅事情。

三歲嘅細女平時習慣我一早食完早餐就同佢講goodbye,放假嗰陣見我仲未醒,日日走入嚟叫醒我,仲不停問我點解唔駛返工。好似我係唔應該喺呢個時間出現喺呢個時空嘅外星人咁。

因為姐姐放假,我要負責帶佢去興趣班,佢可能未試過媽媽帶,一時之間適應唔到,變咗貼身膏藥,死都唔肯入去,大喊起來。老師話好多小朋友由媽媽送來都會係咁,爸爸送嘅通常都冇呢啲情況(爸爸,自我檢討一下喇!)。

放假留喺屋企,先知平時佢哋嘅生活係咁嘅,原來玩呢啲嘢,講咁多嘢,咁可愛,不禁會覺得,好似錯過咗好多佢哋成長嘅日子咁。

如果係長輩湊,放假時嘅大發現仲多,發現平時婆婆嫲嫲係唔經唔覺咁縱慣咗小朋友,終於明白點解平時自己講極佢都唔聽。因為,你放假時才發現,原來你係你屋企唯一一個衰人。

有次姐姐放假返家鄉第一晩,我夜晚同細女瞓。佢半夜起身痾wee wee, 朦朧間以為我係姐姐,同我講”Aunty, wee wee!” 我為咗令佢可以繼續瞓,於是講英文扮咗一陣姐姐。點知口音可能扮得唔似,佢清醒後赫然發現我唔係姐姐,喊到收唔到聲。你放假時才發現,原來你喺佢心目中嘅地位,比你想像中仲要低。

不過你都唔需要妒忌姐姐喺你仔女心中嘅地位高過你,因為姐姐喺自己屋企都面對同一個境況,佢仲要係一個遠離家鄉嘅在職媽媽。比起上嚟,你已經幸福得多。多啲珍惜同仔女相處嘅時光!

“To be in the children’s memories tomorrow, you have to be in their lives today.” ~Barbara Johnson

HR Siri

💟💟💟💟💟💟💟💟💟💟💟💟
🤗HR Siri希望成為您的虛擬助理,一起面對生活中的種種挑戰。🙌
🙌如果大家在職場或家庭遇到甚麼趣事或煩惱,都可以告訴HR Siri。
💌歡迎在👇下面留言,或者WhatsApp 9169-4738,一起分享您的喜與樂!

#LoooKLearningBrand #HR Siri #WorkingMumColumn