fbpx

【中年轉工危機】- HR Siri

2020-03-13


仲細時,轉工係容易嘅決定,做完兩三年,邊度人工高啲、福利好啲、前途光明啲、好玩啲、又或者頂唔順而家個老細就會轉。但係對於我哋呢啲年紀、事業已經發展到一個地步、有家庭嘅人嚟講,轉工嘅選擇好多時候都要以家庭為上。轉工嘅時候,考慮嘅都不外乎公司近唔近屋企?有冇彈性?有冇時間放喺小朋友身上呢?要上大陸或者成日出trip嘅會諗,會唔會要同家人分開呢?幾密幾耐?

有時諗諗吓,都係決定唔轉,但係又會面臨「中年危機」嘅問題。以前「中年危機」多發生喺男性身上,並且時間會長一點,但係而家事業型女性愈來愈多,佢哋感受到「中年危機」亦愈來愈普遍及愈來愈長。

人去到中年,唔係想變「廢中」,但係現實就係唔到你再周圍轉,始終都要揾一個落腳點安定落嚟,並且將我們嘅生活定點係一個比較容易控制嘅範圍裏面。你每日嘅生活,開始慢慢變咗返工係為咗放工,搵夠然後返去幫小朋友溫考試做功課,呢個就可能係我哋在職父母生命嘅必經階段。

到小朋友大個咗,開始獨立離巢,嗰份失落感就會嚟啦。屋企無人需要你湊,除非上到位,如果唔係,喺公司開始變咗夾心階層甚至漸漸唔需要你,無可避免地向下滑或者被淘汰,踏入所謂「中年危機」。呢個時候,現實令到佢哋已經唔能夠再發威,於是慢慢就被變成自己小時候最憎嘅公司嘅老油條。但係又唔可以冇咗份工,於是,少做少錯,加上多年嘅鍛練,手腕已經變得非常之老練,吹你唔脹,又奈你唔何。

HR Siri為咗唔好慢慢墮入呢個中年危機而不自知,不停地鞭策自己離開安舒區,不讓自已become complacent。面對未來,你會如何選擇面前嘅路?把握眼前嘅時機?

HR Siri

💟💟💟💟💟💟💟💟💟💟💟💟
🤗HR Siri希望成為您的虛擬助理,一起面對生活中的種種挑戰。🙌
🙌如果大家在職場或家庭遇到甚麼趣事或煩惱,都可以告訴HR Siri。
💌歡迎在👇下面留言,或者WhatsApp 9169-4738,一起分享您的喜與樂!

#LoooKLearningBrand #HR Siri #WorkingMumColumn #中年轉工危機