近排同步一次過煲咗幾套韓劇，除咗大熱必看嘅〈夫妻的世界〉之外，仲包括一些之前好想睇但係冇時間睇嘅，當中，就包括2014年嘅一套神劇〈未生〉。睇完頓時正能量返哂嚟！

〈未生〉係透過一個職場新鮮人嘅角度，去寫辦公室嘅各種角力及政治，劇中每一個角色都好寫實，令我諗起好多年前BBC處境喜劇”The Office”嘅角色。佢係一套十分反映現實（除咗入面主角成日去嘅透氣天台靚景只能令香港人羡慕）嘅劇集，令人會心微笑，又會感動落淚。

四個初生之犢不畏虎嘅新鮮人，初進辦公室之後面對種種困難同不公平嘅對待，睇佢哋如何在罅縫之中找到生存嘅機會，就如清泉一樣，可愛又可笑，令我諗起自己初出茅廬嘅時候。一個不懂擦鞋但對業務充滿浪漫激情、表面惡死但心存大愛嘅老臣子科長，同下屬之間嘅亦師亦友嘅關係，又係令人津津樂道。

結局係極現實，令人諗乜嘢係每人自己應走嘅路，一句「其實地上本沒有路，走的人多了，也便成了路。」完美的點綴了成個劇集嘅正向思想。象棋中嘅「未生」概念，亦都恰好地穿梭在劇情中，與劇名及男主角嘅背景緊緊相扣。棋子一日還在棋盤上，終能連成一線，就能發生變化，make a difference。

快到七月，又係年輕畢業生進入職場嘅月份，誠意推介〈未生〉呢套韓劇。做嘢做到滑咗牙嘅一眾海鮮們，也應該睇睇，搵返自己份初心。未搵到工嘅畢業生，今年係好大挑戰，但係路係人行出嚟嘅，加油！邊搵工邊煲劇！

HR Siri

💟💟💟💟💟💟💟💟💟💟💟💟
🤗HR Siri希望成為您的虛擬助理，一起面對生活中的種種挑戰。🙌
🙌如果大家在職場或家庭遇到甚麼趣事或煩惱，都可以告訴HR Siri。
💌歡迎在👇下面留言，或者WhatsApp 9169-4738，一起分享您的喜與樂！
#LoooKLearningBrand #HR Siri #WorkingMumColumn